Greqia i ka kërkuar Shqipërisë që të ekstradojë të riun shqiptar që akuzohet për pjesëmarrjen në vrasjen e 19- vjeçarit grek në Selanik Alkis Kampanos. Ministri grek i Mbrojtjes Civili, Takis Theodoricakos ka deklaruar se Shqipëria duhet të ekstradojë menjëherë të riun që dyshohet se fshihet në vendin tonë.
Alkis u vra në orët e para të 1 shkurtit. Pa mbushur as 24 orë, 20-vjeçari ka mbërritur me makinë në orën 23:45 në Stacionin Kufitar në Krystallopigi, ku si autoritetet greke ashtu edhe ato shqiptare i i vulosen pasaportën.
Kështu ai ka shkuar në Shqipëri, sipas informacioneve të Mega.
Të dhënat e tij u kontrolluan 30 herë pas asaj nate, nga policia greke dhe ajo shqiptare. Për momentin, ai mbetet i pagjetur dhe ndaj tij nuk ka asnjë urdhër ndërkombëtar . Megjithatë, duket se nga provat e mbledhura nga Sigurimi i Selanikut nga vendi ku ra i vdekur 19-vjeçari, ka të dhëna të qarta se 20-vjeçari ka marrë pjesë në atentatin e përgjakshëm.
Sipas ministrit grek, kërkesa për ekstradim pritet të bëhet brenda ditës për të dërguar në gjykim të riun shqiptar që dyshohet të ketë marrë pjesë direkt në vrasjen e 19 vjeçarit grek Alkis Kampanos. 19 vjeçari u vra gjatë një përleshje nga një grup tifozësh javën e kaluar në Selanik. Nga kjo ngjarje mbetën të plagosur edhe shokët e tij, tifozë të skuadrës së futbollit Aris të cilët u përplasën me ata të PAOK-ut ku për pasojë mbeti i vrarë i riu grek.
Për këtë ngjarje janë arrestuar 10 persona, midis tyre edhe një 23 vjeçar shqiptar i cili ka rrëfyer gjithçka di për policinë dhe prokurorinë greke. Ndërkohë që është në kërkim një tjetër 23 vjeçar shqiptar i cili dyshohet se fshihet në Shqipëri, ka theksuar ai në një intervistë për televizion grek Sky.
Për rastin e tij, ministri grek Theodoricakos theksoi se do të lëshohet një urdhër ndërkombëtar arresti. Ndërsa një tjetër i ri që kërkohej nga policia greke është vetëdorëzuar ditën e sotme pranë autoriteteve të Selanikut.
Policia bastisi klubet e futbollit në Athinë dhe Selanik javën e kaluar, ku konfiskoi edhe armë.
Sipas policisë, objektivi i autorëve kanë qenë tifozë të tjerë të Arisit, të cilët shkonin shpesh në vendin ku ndodhi ngjarja. 19 vjeçari Campanos dhe shokët e tij u gjendën në atë rrugicë dhe u përleshën me grupin e tifozëve të PAOK-ut pasi iu kishin thënë atyre se ishin tifozë të skuadrës së Arisit.