Në Dibër ka nisur prej ditësh përgatitja e infrastrukturës për zgjedhjet e pjesshme vendore që do të mbahen me datë 6 Mars. Autoritetet përgjegjëse kanë përcaktuar 101 qendrat e votimit e po ashtu janë afishuar edhe listat e votuesve.
Prefekti i Qarkut Dibër, Nexhbedin Shehu tha se pushteti vendor është angazhuar për të informuar të gjithë votuesit për qendrën e tyre të votimit, ndërsa Komisioni Zonal i Administrimit Zgjedhor po punon për regjistrimin e kandidatëve dhe dokumentacionet e tjera të nevojshme për procesin zgjedhor.
Deri mesditën e sotme, zyrtarisht janë 3 kandidat për kryetar të Bashkisë Dibër në zgjedhjet e 6 Marsit, Rrahim Spahiu nga Partia Socialite, Luan Haka nga Partia Dsemokratike dhe Premtim Kryemadhi nga koalicioni “Shtëpia e lirisë”. Mësohet se në fletët e votimit do të jetë dhe një kandidat i katërt emri i të cilit nuk është bërë ende i ditur.
Afati i fundit i kandidatëve për tu regjistruar është deri në orën 24:00 të mbremjes së kësaj të Mërkure.