Kryeministri Edi Rama tha se përgjegjësia ligjore e ministrave të tij është individuale. Në një intervistë për “Zërin e Amerikës”, kreu i qeverisë u pyet nëse ka frikë se mund të dalin të tjerë ministra. Ai theksoi se nuk i frikësohej një gjëje të tillë, pasi Reforma në Drejtësi për këtë është bërë.
Sipas tij, nëse dalin të tillë duhet të marrin ndëshkimin e merituar, sepse kanë vepruar pas shpinës së qeverisë.
“Unë nuk jam i shqetësua se mund të dalin ministra apo ish ministra apo kushdo qoftë sepse për këtë e kemi bërë reformën në drejtësi. Kur unë e kam thënë që reforma bëhet për një drejtësi të drejtë dhe nga ana tjetër përgjegjësia për rolin e çfarëdo qoftë është individuale. Nëse ka njerëz që kanë ngjyer gishtin apo dorën në një proces që është bërë për t’i shërbyer vendit sigurisht që ata duhet të marrin ndëshkimin e merituar sepse e kanë bërë pas shpinës së një qeverie”, tha Rama.
Rama është pyetur gjithashtu për aferën e inceneratorëve se përse shkeljet nuk janë vënë re nga asnjë hallkë.
Kryeministri tha se për këtë çështje po heton SPAK dhe vuri sërish theksin te “përgjegjësia individuale”.