Eksperti i sigurisë Ervin Karamuço, ka zbuluar se grupet satanike janë shtuar së tepërmi në Shqipëri, duke marrë jetë njerëzish përmes sakrificës. Karamuço ka shpjeguar në studion e “ABC Live”, se Shqipëria ende nuk ka ligj që ndalon apo ndëshkon këto aktivitete. Eksperti ka publikuar një video të xhiruar në një prej plazheve të Shqipërisë, teksa thotë se bëhet fjalë për ritin e vrasjes së një qeni.
Karamuço tha se kohët e fundit janë vërejtur edhe fenomene të çuditshme nëpër varreza.
Ai renditi varrezat e Durrësit dhe të Shkupit ku janë kryer rite satanike, por ndryshe nga Shqipëria, në Maqedoninë e Veriut personat që e kanë bërë këtë janë ndëshkuar.
“Këto rite bëhen kryesisht në ritet e vona të natës dhe në vende të ndryshme, përfshi edhe varrezat. Ka njerëz që përmes magjisë së zeze duan të ndikojnë në botën e përtejme në shpirtrat e personave që kanë urryer apo që i kanë dashur duke i dërguar sipas tyre në ferr apo duke i rikthyer ata që kanë dashur. Pak kohë më parë mësuam se një rit satanik ishte bërë në varrezat e Durrësit. Së fundmi kemi patur edhe një rast në varrezat e Shkupit”, tha Karamuço duke theksuar se sektet satanike bëjnë rite të ndryshme.
“Ka rite që xhirohen gjatë natës dhe hidhen në rrjetet sociale. Ka patur mjaft raste që janë shkruar gjëra të ndryshme mbi pllakata në këto varreza. Secili sekt ka doktrinën e tij. Ata e bëjnë këtë për interesat e tyre kriminale”, tregon Karamuço.