Kancelari gjerman, Olaf Scholz, mësohet se ka urdhëruar Ministrinë e Ekonomisë që të pezullojë mejnëherë procesin e çertifikimit të gazsjellësit “Nord Stream II”.
Shkak për këtë vendim i Scholzit u bënë veprimet e fundit të Rusisë për të njohur dy rajonet separatiste në lindje të Ukrainës.
“Ky vendim tingëllon teknik, por është një veprim i nevojshëm administrativ, në mënyrë që të mos ndodhë certifikimi i tubacionit. Pa këtë çertifikim ‘Nord Stream II’ nuk mund të hyjë në funksion”, u tha kancelari gazetarëve.
Kujtojmë se presidenti Vladimir Putin kishte urdhëruar ministrin rus të Mbrojtjes, Sergey Shoygu që të “sigurojë paqe” në rajonet separatiste të Donetskut dhe Luhanskut.
Kjo njohje nga Putin është si pretekst për të pushtuar Ukrainën, edhe pse deri më tani nuk janë parë lëvizje apo tërheqje e trupave ruse përgjatë kufirit ukrainas.
Tashmë gjenden rreth 200 mijë ushtarë rusë përgjatë vijës kufitare me Ukrainën, që prej muajsh janë në gjendje gatishmërie dhe sipas agjencive amerikane të inteligjencës, Putin mundet çdo çast të urdhërojë pushtimin e vendit.