Ministria ruse e Mbrojtjes deklaroi këtë të shtunë se i ka përcjellë urdhër ushtrisë për të avancuar më tej ofensivën e tyre në Ukrainë pasi pala ukrainase refuzoi të ulet për bisedime. “Avanconi në të gjitha drejtimet” mësohet të ketë qenë urdhëri i zyrtarëve rusë.
“Pasi pala ukrainase refuzoi procesin e negociatave, sot të gjitha njësive u është dhënë urdhri të zhvillojnë avancim nga të gjitha drejtimet në përputhje me planet operacionale”, njoftoi zëdhënësi i ushtrisë ruse, Igor Konashenkov, nëpërmjet një deklarate.
Të premten u bë e ditur nga Kremlini se rusët kishin dërguar një delegacion në Bjellorusi për bisedime me Ukrainën, por kjo e fundit ka kërkuar që bisedimet të mbahen në Varshavë. Kjo mosmarrëveshje ka shtyrë Ministrinë e Mbrojtjes së Rusisë të marrë vendimin për zgjerimin e ofensivës në Ukrainë.
Ndërkohë, nga Ukraina raportohet se sulmet nga Rusia janë duke u kryer nga shume drejtime, një prej tyre eshte edhe drejtimi nga Bjellorusia.