Eksperti i kriminalistikës Ervin Karamuço ka sjellë në emisionin “Opinion” detaje të një studimi prej 400 faqesh, të zhvilluar në SHBA ku analizohet profili dhe karakteri i presidentit rus Vladimir Putin.
Duke iu referuar studimit të nisur në vitin 2005, që ka kushtuar 350 mijë dollarë dhe që është publikuar i censuruar në vitin 2011, Karamuço tha se është dalë në përfundimi që Putin mund të ketë sindromën asperger, të spektrit autik. Nga ana tjetër, Karamuço tha se sipas studimit, Putin ka një traumë të bullizmit që i vogël, gjë që është edhe në dosjen e tij.
“Studimi ka dalë në përfundimin që ai mund të ketë sindromën asperger, që është një spektër autik, por janë 30% skeptik se duhet bërë një test imazherik me skaner. Dyshohet që ka një anormalitet neurologjik, nga mënyra si ecën e si mban njërin krah. Kjo mund të jetë dhe e lindur dhe çon në çrregullime emocionale. Personaliteti është i zejtarit, introvert, i ndjeshëm, por jo i ndjeshëm për të patur empati ndaj të tjerëve. Është shumë i perceptueshëm si analizon dhe i mprehtë. Që do të thotë se është shumë i rrezikshëm nëse ndërmerr plane për të sulmuar. Të gjitha luftrat që ndërmerr i çon deri në fund. Ka një kamuflim të imponuar psikologjik që vjen nga kurset e spiunazhit pasi kërkon të jetë i palexueshëm.
Ka një traumë të bullizmit që i vogël. Dobësitë e veta i ka projektuar tek Bashkimi Sovjetik që e pa të binte në ‘90, që i ngjau si vetja edhe BS, i ngjau i dobët.
Për shkak të bullizmit (është quajtur hollaku vogëlushi), u mor me arte marciale. Kemi elementë të sadizmit. Është rasti i Merkelit që ai e dinte se e kishte kafshuar një qen dhe ja futi në zyrë për t’i thënë, që unë jam i pushtetshmi”, tha Karamuço.