Klarens Sedorf ka vendosur të përqafojë besimin islam. Ka qenë vetë holandezi ai i cili me një postim në Instagram, dha lajmin se kishte marrë këtë vendim të rëndësishëm për jetën e tij. Sipas mediave holandeze, ai ka vendosur që të ndryshojë besimin e tij teksa ka jetuar në Dubai, në Emiratet e Bashkuara Arabe.
Por ai ka zgjedhur që të mbajë emrin e tij të lindjes, duke mos e ndryshuar atë, “Do të vazhdoj të përdor atë që më kanë dhënë prindërit e mi, Klarens Sedorf. Një falënderim special për mesazhet e bukura që më keni dërguar për hyrjen time në familjen myslimane. Jam shumë i lumtur dhe i gëzuar që i bashkohem të gjithë vëllezërve dhe motrave në botë, në veçanti Sofias time të adhuruar që më ka mësuar në mënyrë më të thelluar kuptimin e islamit”, shkruante ndër të terja në postimin e tij ish-futbollisti i njohur holandez.
Ndryshimi ka ndodhur pas martesës së tij me iranianen Sofia Makramati, disa vite pas divorcit me gruan e tij të parë, brazilianen Luviana me të cilën kishte katër fëmijë.