Një sërë foto të disa civilëve të vrarë të cilët ishin në përpjekje për t’iu larguar bombardimeve në Irpin, në Irpin kanë bërë sot xhiron e rrjetit. E gjithë bota është prekur nga këto imazhe dhe më të dhimbshme këtë ngjarje e bën edhe fakti që mes viktimave, ishin edhe 2 fëmijë.
Fotot e shkrepura nga një fotograf i “New York Times” tregojnë 3 anëtarë të një familjeje prej katër anëtarësh, një nënë dhe dy fëmijë, përtokë të vdekur në trotuar, ndërsa ushtarët ukrainas përpiqen t’i shpëtojnë jetën babait të plagosur.
Familja kishte ikur nga luftimet, ndërsa me vete kishte marrë një valixhe dhe disa çanta shpine bashkë me qenin e vogël. Ata u goditën nga një sulm me mortaja. Forcat ruse kanë gjuajtur me predha mortajash në një urë tashmë të shembur, e cila përdoret për evakuimin e civilëve, përfshirë fëmijë.
Ukraina ka akuzuar forcat ruse se synojnë qëllimisht rrugët e evakuimit nga Irpin, pasi një hekurudhë u godit dhe u dëmtua të shtunën. Irpin si dhe qytetet e vogla të Hostomel dhe Bucha në veri-perëndim të Kievit janë përballur me luftime të ashpra ditët e fundit.