Ditën e djeshme, forcat ruse qëlluan në mënyre krejt të pamëshirshme një turmë njerzish që iknin me vrap nga bombardimet. Mes viktimave, ishte edhe një nënë me dy fëmijët e saj. Nga këto të shtëna raportohet se të paktën tetë persona u vranë, kur raketat ranë mbi qindra ukrainas të tmerruar, ndërsa ata largoheshin të lemeritur nëpër një urë për t’i shpëtuar bombardimeve ruse, në Irpin, pranë Kievit.
Ndërkaq, mijëra ukrainas të tjerë mbetën të bllokuar në qytetin port të Mariupolit i cili është ende i rrethuar, pasi Presidenti rus, Vladimir Putin, prishi paktin e armëpushimit për të dytën ditë radhazi. Kujtojmë se sot në mëngjes, Rusia shpalli një armëpushim të ri në qytetet Kiev, Mariupol, Kharkiv dhe Sumy.
Duke komentuar sulmin e llahtarshëm që ndodhi dje në Irpin, Presidenti i Ukrainës, Volodymyr Zelensky, u zotua të ndëshkojë “çdo bastard” që kreu mizori gjatë luftës. Duke përshkruar familjen e vrarë në Irpin, ai tha se “Ata thjesht po përpiqeshin të dilnin nga qyteti. Për të shpëtuar. E gjithë familja. Sa familje të tilla kanë vdekur në Ukrainë? Ne nuk do të falsim. Nuk do të harrojmë. Ne do të ndëshkojmë të gjithë ata që kanë kryer mizori”. Duke iu drejtuar forcave ruse pas sulmit, Zelensky theksoi se “Nuk do të ketë vend të qetë në këtë tokë për ju, përveç varrit”.
“The Sun” ka nxerrë në dritë pamjet e tragjedisë që shkaktoi sulmi rus, ku u vra një familje. Përkatësisht një vajzë tetëvjeçare me vëllain dhe nënën e tyre. Besohet se në sulm është vrarë edhe një mik i familjes.
