Policia e Shtetit ka reaguar në lidhje me protestën e organizuar para kryeministrisë dhe në rrugët e Tiranës kundër rritjes së çmimit të naftës. Në një njoftim të bërë publik, policia thotë se është në gatishmëri për të ruajtur rendin dhe sigurinë, por bën thirrje që qytetarët të mos përfshihen në akte dhune, pasi do të përballen me ligjin.
“Policia e Shtetit u bën thirrje të gjithë qytetarëve që të mos përfshihen në akte dhune dhe paligjshmëri, në çfarëdolloj forme të shfaqjes së saj, sepse do të përballen me forcën e ligjit”, thuhet në njoftim.
Policia e Shtetit, thotë se ashtu sikurse është e angazhuar për të mbrojtur të drejtat dhe liritë e qytetarëve, është e vendosur të marrë masa ndaj çdo paligjshmërie dhe të procedojë penalisht çdo person që kryen akte në dëm të qytetarëve apo të lëvizjes së lirë të tyre.