Ministri i Jashtëm ukrainas, Dmytro Kuleba ka deklaruar sot se vendi i tij është i gatshëm për të hyrë në negociata me Rusinë, por ai theksoi se Ukraina nuk do t’i dorëzohet kurrë regjimit të Vladimir Putin dhe nuk do të pranojnë asnjë ultimatum prej tij.
Teksa foli për gazetarët, Kuleba tha se mbetet i hapur ndaj diskutimeve diplomatike me Moskën, por paralajmëroi se kjo e fundit po bën kërkesa të cilat tingëllojnë të papranueshme për Ukrainën.
Ai vijoi më tej duke thënë se forcat e Kievit do të kenë nevojë për më shumë furnizime ushtarake dhe përsëriti kërkesat drejtuar vendeve perëndimore për të furnizuar vendin me avionë të rinj luftarakë.
Bazuar në fjalët e tij, nëse mbrojtja ajrore e vendit forcohet atëherë mund të shpëtohen më shumë jetë civilësh.
Ndër të tjera, ministri Kuleba pohoi gjithashtu se Moska ka përdorur taktika të ngjashme me ato të përdorura gjatë luftës civile në Siri ndërsa u bëri thirrje vendeve perëndimore që të ndihmojnë Ukrainën në hetimet dhe ndjekjet e mundshme të ardhshme të krimeve të luftës ruse.