Një grup ushtarësh rusë kanë ekzekutuar pa mëshirë një qytetar ukrainas, i cili ishte vetëm dhe po përpiqej të dorëzohej duke ngritur duart lart. Pamjet e vrasjes janë kapur nga ajri përmes një droni.
Videoja në fjalë është siguruar nga transmetuesi gjerman “ZDF” dhe është xhiruar më 7 mars, ditë kur ka ndodhur edhe ngjarja. Ajo tregon një makinë të argjendtë që lëviz përgjatë autostradës evropiane “E40” në perëndim të Kievit .
Makina po shkon drejt Kievit, por duke parë një tank rus dhe një grup ushtarësh të parkuar në anë të rrugës, shoferi bën një kthesë të shpejtë para se të frenojë dhe të ndalojë. Burri del nga makina dhe menjëherë ngre duart mbi kokë, duke u kthyer për t’u përballur me ushtarët rusë në një shfaqje të qartë të dorëzimit. Por brenda pak sekondash ai u qëllua me gjakftohtësi.
Pak më vonë, një bandë ushtarësh shihet duke rrëmbyer trupin e pajetë të civilit dhe duke e tërhequr zvarrë në pemët aty pranë.
Operatori i dronëve, një anëtar i forcave të mbrojtjes territoriale të Ukrainës në Kiev, tha se një grua dhe një fëmijë po udhëtonin gjithashtu në makinë dhe më pas u kapën nga forcat ruse. Therja e civilëve, veçanërisht e atyre që nuk paraqesin kërcënim, konsiderohet një krim lufte sipas ligjit ndërkombëtar humanitar.
Megjithatë, autoritetet ruse vazhdojnë të këmbëngulin se forcat e tyre kanë shënjestruar vetëm lokacione strategjike ushtarake dhe nuk po bëjnë luftë kundër popullatës civile të Ukrainës.