Këtë të enjte, kancelari gjerman Olaf Scholz dhe Sekretari i Përgjithshëm i NATO-s Jens Stoltenberg, kanë mbajtur një konferencë të përbashkët për shtyp në Berlin ku folën rreth situatës në Ukrainë. Në fjalën e tij, Scholz tha se NATO nuk do të rrezikojë një përshkallëzim në luftën në Ukrainë duke ndërhyrë me forcë ushtarake.
“Është detyra kryesore e aleancës të sigurojë sigurinë e të gjithë anëtarëve,” u shpreh ai.
Sakaq, Gjermania po dërgon ndihma të mëdha financiare dhe humanitare, si dhe mallra ushtarake në Ukrainë, por Berlini ka deklaruar vazhdimisht se nuk do të dërgojë avionë luftarakë për të ndihmuar forcat ukrainase në mbrojtjen e tyre kundër pushtimit rus.
“Fati i njerëzve në Ukrainë na prek thellë”, tha Scholz pas një fjalimi të presidentit ukrainas Volodymyr Zelensky në parlamentin gjerman. “Putini sjell vuajtje të tmerrshme dhe vdekje për njerëzit në Ukrainë… Ne jemi me Ukrainën”, deklaroi kancelari.
Scholz vijoi më tej duke shtuar se Putini mban përgjegjësinë e vetme për vdekjen e të rinjve rusë në ushtri. “Ne jemi gjithashtu të prekur nga ata shumë të rinj rusë të udhëhequr nga lidershipi i tyre që kundërshtojnë një luftë të pakuptimtë,” tha ai.