Nëpërmjet një letre të dërguar, Presidentja e Kosovës, Vjosa Osmani i ka kërkuar presidentit amerikan, Joe Biden të ndihmojë vendin e saj në përpjekjet që ai po bën për anëtarësimin në NATO.
Osmani ka shkruar në letër se Kosova aktualisht është një faktor kyç në promovimin e stabilitetit rajonal si dhe e ka vënë theksin tek arritjet e shtetit në respektimin e demokracisë, duke thënë se pavarësisht se Kosova është një vend i dalë nga lufta, ajo shërben edhe si shembull në këtë drejtim për skenën ndërkombëtare.
Më tej, Vjosa Osmani i ka shprehur presidentit Biden se rrethanat e reja të krijuara në Europë pas sulmit rus në Ukrainë kanë prodhuar edhe urgjencën e Kosovës për të hyrë në NATO dhe organizata të tjera ndërkombëtare.
“Integrimi euroatlantik ka qenë gjithmonë qëllimi ynë, por sot – nën dritën e ngjarjeve të paprecedenta në kontinentin Europian – është prioriteti ynë kryesor i sigurisë kombëtare. Europa është duke u përballur me kohërat më të errëta dhe të rrezikshme që nga përfundimi i Luftës së Ftohtë. Derisa ne ndajmë qëllimin e përbashkët për mbrojtjen dhe promovimin e sigurisë globale, anëtarësimi i Kosovës në NATO është bërë e një rëndësie kruciale. Argumentet që e kundërshtojnë anëtarësimin e Kosovës në NATO shpërfillin rëndësinë e sigurisë në Ballkanin Perëndimor dhe nuk i shërbejnë interesit të botës së lirë demokratike, e cila është e rrethuar nga tendencat në rritje autoritare dhe politikat e tyre agresive”, ka shkruar Osmani në letër.
Osmani ka shkruar se Kosova edhe pse është vendi më pro amerikan dhe më pro NATO në botë, megjithatë, edhe sot e kësaj dite “mbetet e përjashtuar nga procesi, marrëveshjet dhe programet e zgjerimit të NATO’s, siç është Partneriteti për Paqe (PfP) dhe ende nuk është bërë anëtare e plotë e Kartës së Adriatikut (A5)”.
“Ne shprehim besimin dhe pritshmërinë tonë që SHBA’ja do të përdorë lidershipin dhe ndikimin e saj për të mbështetur dhe avancuar në mënyrë aktive procesin kompleks të anëtarësimit në NATO për Kosovën duke filluar me programin PfP dhe anëtarësimin e plotë në Kartën e Adriatikut”,
Në fund të letrës së saj, Osmani ka theksuar dëshirën e fortë që ka për një takim me presidentin e SHBA-ve, duke thënë se mezi pret që të takohet personalisht me të.
