Nga sa raportojnë mediat amerikane, presidenti i SHBA-ve, Joe Biden pritet të paralajmërojë Xi Jinping se Amerika është e vendosur për t’u hakmarrë nëse Pekini mbështet në mënyrë aktive Rusinë në Ukrainë. Kjo është ajo çka shkruan prestigjozja “Financial Times”, referuar bisedës telefonike mes dy liderëve që do të zhvillohet sot.
Ndërkohë, sekretari amerikan i shtetit, Antony Blinken ka deklaruar se Biden do të bëjë të qartë se Kina do të marrë përgjegjësinë për çdo veprim të ndërmarrë për të mbështetur agresionin rus.
Po ashtu edhe Jen Psaki, një zyrtare e shtypit e Shtëpisë së Bardhë u komunikoi gazetarëve se kjo telefonatë do shërbejë si një mundësi që Biden të kuptojë pozicionin e Presidentit Xi. Bëhet e ditur gjithashtu se gjatë kësaj telefonate, Biden do i kërkojë Xi Jinping që të përdorë ndikimin e tij për të bindur Putinin t’i japë fund luftës.