Një ngjarje e rëndë është raportuar në Itali ku një refugjate nga Ukraina, 46-vjeç, vdiq pak pasi zbriti nga autobusi që e kishte çuar në Itali dhe larg luftës. Gruaja vdiq në sy të dy fëmijëve të vegjël me të cilët kishte përballuar udhëtimin 30 orësh.
Menjëherë pas zbritjes nga autobusi, gruaja u rrëzua përtokë duke u ankuar për dhimbje të forta në gjoks dhe duke mbetur e pa vetëdijshme për disa minuta.
Viktima kishte udhëtuar me refugjatë të tjerë nga Ukraina së bashku me dy fëmijët e saj të mitur. Fëmijët tani janë në një strehë sociale.
Roma Today raporton se autobusi ishte nisur nga Ternopili në Ukrainën perëndimore 30 orë më parë. “Në orën 7:36 mbërriti një kërkesë për ndihmë nga policia e shtetit në qendrën operative 118 në Romë, duke na lajmëruar për një zonjë të sëmurë. Në orën 7:37 u aktivizua ambulanca në stacionin e CTO dhe mbërriti në vendngjarje në orën 07:46, e ndjekur nga automjeku në stacionin San Camillo.
Me të mbërritur në vendngjarje, zonja ishte pa ndjenja dhe në arrest kardio-qarkullues. Ekipi shëndetësor u përpoq të risillte në jetë pacientin, por të gjitha përpjekjet për fat të keq ishin të kota”, shpjegoi urgjenca.