Sot kemi hyrë në ditën e 25-të tëluftimeve që po zhvilloen mes Rusisë dhe Ukrainës. Në prononcimin e tij të fundit, presidenti ukrainas, Volodymyr Zelensky, deklaroi se sulmet e rusëve ndaj qytetit të rrethuar të Mariupolit janë krime lufte dhe “akte terrori” që do të “mbahen mend për shekuj me radhë. Mariupoli do të mbahet mend gjatë në histori si shembulli i krimeve të luftës”, tha ai.
Nëpërmjet një video-mesazhi të cilin e publikoi në orët e para të kësaj të diele, Zelenskyy tha mes të tjerash edhe:L
“T’ia bësh këtë një qyteti paqësor, atë që pushtuesit e bënë, është terror që do të mbahet mend për shekuj me radhë.”
Lidhur me negociatat me Rusinë, ai i’u drejtua të gjithë ukrainasve duke u thënë se ato nuk janë “as të thjeshta as të këndshme, por janë të nevojshme”.
Mes të tjerash, gjatë fjalës së tij në këtë video-mesazh, presidenti Zelenskyy u shpreh se të shtunën ka biseduar me presidentin e Francës, Emmanuel Macron, lidhur me kursin e bisedimeve me Rusinë.
“Ukraina gjithmonë ka kërkuar zgjidhje paqësore. Për më tepër, ne jemi të interesuar për paqe tani”, është shprehur presidenti ukrainas.
Qyteti-port i Mariupolit është rrethuar nga trupat ruse dhe banorët e mbetur të bllokuar kanë mungesa të mëdha të ujit dhe ushqimit, teksa janë përballur me bombardime të vazhdueshme. Të shtunën u raportua se trupat ruse kanë depërtuar brenda qytetit dhe se pati luftime edhe në qendër të këtij qyteti.
Ndërkohë, autoritetet lokale në Mariupol kanë thënë se disa mijëra banorë të këtij qyteti janë dëbuar në territorin rus.