Një aksident tragjik ka ndodhur në Belgjikë ku për pasojë kanë humbur jetën gjashtë persona. Ngjarja fatale ndodhi këtë të dielë në qytetin La Louvière, ku një makinë u fut mes një turme që ishte mbledhur për të marrë pjesë në karnavale.
Po ashtu, nga ky aksident mbetën të plagosur edhe 20 persona të tjerë. Janë ende të paqarta rrethanat e kësaj ngjarjeje megjithatë ajo është cilësuar si aksident duke mohuar mundësinë për ndonjë sulm të mundshëm terrorist.
“Një makinë që lëvizte me shpejtësi të madhe u përplas në turmën që ishte mbledhur për të marrë pjesë në karnavale,”, deklaroi kryetari i bashkisë së qytetit jugor belg, Zhak Gobert.për agjencinë e lajmeve Belga.
Ndërkohë, sipas një njoftimi për shtyp nga zyra e kryetarit, një grup prej rreth njëqind personash sapo kishin dalë nga një sallë duke u nisur për në qendër të fshatit, kur automjeti u përplas në turmë.
“Ajo që supozohej të ishte një festë e këndshme është kthyer në një tragjedi. Ne po monitorojmë situatën nga afër,” ishte mesazhi i Ministres së Brendshme belge, Annelies Verlinden në “Twitter”.