Mbledhja e radhës e zhvilluar ditën e sotme e Bordit të Transparancës i cili u ngrit për të menaxhuar çmimin e tregtimit të karburantit me shumicë/pakicë të nënprodukteve të naftës dhe gazit, ka përcaktuar çmimet e reja të naftës dhe benzinës në vendin tonë, të cilat kanë shënuar rritje në krahasim me nivelin aktual.
Sipas informacioneve të dala nga kjo mbledhje, çmimi i naftës do të jetë 221 lekë për litër, nga 203 lekë që ishte deri më sot dhe benzina 211 lekë, nga 206 që ishte më pare. Vendimi hyn në fuqi nga e marta, datë 22 mars deri të enjten.
Ndërkohë, operatorët e tregut thonë se dhe në këto nivele janë 15 lekë me humbje. Ata shprehen se prisnin që bordi të bënte transparencë për çmimet jo të fiksonte çmimet. Kjo situatë po i vë operatorët në vështirësi. Sipas tyre marzhi prej 5% që u është lënë tregtuesve mbi çmimin pa taksat nuk mjafton për mbulimin e kostove, por ai duhet të jetë rreth 15%.
Sipas operatorëve, benzina ka qenë më e shtrenjtë se nafta për shkak se ka firo më të larta, ngaqë avullon shpejt dhe shitet më pak.
Së fundmi, theksojmë se nafta në bursa është shtrenjtuar në 113 dollarë për fuçi, nga nën 100 dollarë që zbriti në momentin që tek ne u ul me 203 lekë per litër.