Përfaqësuesja e Spanjës ka nisur sot grumbullimin e saj për ndeshjet miqësore të marsit, ndaj Shqipërisë dhe Islandës. Dy sfida të cilat spanjollët do i interpretojnë si ndeshje zyrtare, duke filluar nga ajo ndaj kuqezinjve dhe kjo kuptohej qartësisht që në fjalët e tyre para fillimit të grumbullimit.
“Është kënaqësi të jesh këtu përsëri. Kishim kohë dhe të them të drejtën kishim dëshirë të takoheshim edhe një herë. Do të jemi të gjithë bashkë, me trajnerin dhe të përgatitemi për ndeshjet që vijnë”, tha Erik Garsia, mbrojtësi i Barcelonës.
“Është kënaqësi të vijmë këtu me shokët e skuadrës. Ky është një vit i rëndësishëm, do të shkojmë të përgatitim gjithçka mirë dhe të bëjmë ndeshje të mëdha që të na ndihmojnë për të ardhmen”, shtoi Markos Jorente i Atletiko Madrid.
“Kemi mundësinë që të jemi bashkë dhe të stërvitemi, që është gjithmonë e rëndësishme dhe nuk ka ndeshje miqësore”, theksoi mbrojtësi i Çelsit, Markos Alonso, para fillimit të grumbullimit.