Gjatë një fjalimi televiziv, Presidenti i Ukrainës, Volodymyr Zelenskyy u shpreh të mërkurën se afro 100,000 njerëz po përballen me kushte çnjerëzore në Mariupol, ndërsa përjetojnë sulmet e pamëshirshme nga forcat ruse në qytetin juglindor ukrainas.
Zelenskyy theksoi se qytetarët e Mariupolit ishin plotësisht të bllokuar nga ushtria ruse.
“Pa ushqim, pa ujë, pa ilaç. Nën granatime të vazhdueshme, nën bombardime të vazhdueshme”, deklaroi ai.
Presidenti Zelenskyy vijoi më tej duke thënë se pavarësisht bombardimeve, më shumë se 7,000 banorë të Mariupolit janë shpëtuar nga qyteti i rrethuar në 24 orët e fundit. Megjithatë, ai tha se rreth një e katërta e popullsisë, vazhdojnë ende të jenë bllokuar në qytet e që po trajtohen siç thotë ai në kushte çnjerëzore.
Qyteti i Mariupolit është i rrethuar nga forcat ruse, të cilat kanë bombarduar me sulme ajrore qytetin me rëndësi strategjike prej ditësh. Ushtria ruse do të marrë Mariupolin në mënyrë që të krijojë një korridor tokësor midis Krimesë dhe rajoneve të mbështetura nga Rusia të Luhansk dhe Donetsk në Ukrainën juglindore.