Sot në fshatin Rripë të Njësisë Administrative Gurrë është organizuar një ceremoni përkujtimore me rastin e 25-vjetorit të rënies në krye të detyrës të efektivit të Policisë së Shtetit Fiqiri Koçi.
Të pranishëm në ceremoni ishin familjarët e të ndjerit, përfaqësues të pushtetit vendor, punonjës policie të DVP Dibër dhe të Komisariatit të Policisë Mat, të cilët vendosën kurora me lule dhe mbajtën një minutë heshtje në shenjë nderimi dhe vlerësimi të veprës së tij.
Fiqiri Koçi me datë 25 mars 1997, duke qenë në krye të detyrës për ruajtjen e një objekti bankar, u vra pabesisht nga dora e krimit. Kontigjente të krimit tentuan të grabisin forcërisht bankën në qendër të qytetit por hasën në rezistencën e Koçit. Grabitësit e maskuar dhe të armatosur shfrytëzuan një person me probleme mendore dhe pasi e pajisën me armë e nxitën atë të qëllojë pabesisht punonjësin e policisë Fiqiri Koçi.
Familjarët e “Dëshmorit të Atdheut” Fiqiri Koçi falenderuan autoritetet e Policisë për vlerësimin që i bëhet të afërmit të tyre.