Menaxheri i një lokali në Elbasan është përleshur me një klient ku është përdorur dhe armë zjarri. Policia është sinjalizuar menjëherë duke parandaluar përshkallëzimin e mëtejshëm të konfliktit.
Ka qenë një sherr i momentit në orët e vona të natës së të hënës në një lokal në lagjen “Viserian Xhuvani”. Policia është lajmëruar nga qytetarët se janë dëgjuar të shtëna me armë dhe është nisur menjëherë drejt vendngjarjes.
Në flagrancë është arrestuar një 41-vjeçar i cili ka qëlluar me armë në ajër e në momentin që kanë mbërritur efektivët ka hedhur armën në tokë dhe ka tentuar të largohet.
NJOFTIMI I PLOTE
Policia parandalon përshkallëzimin e mëtejshëm të një konflikti me pasoja të rënda.
Ndërhyrja në kohë e Policisë parandalon një konflikt për motive të dobëta midis menaxherit të një lokali dhe klientit, ku është përdorur edhe arma e zjarrit.
Arrestohet në flagrancë nga Policia një 41 vjeçar, i cili ka qëlluar me armë zjarri në ajër dhe në momentin që ka mbritur Policia, ka tentuar të largohet nga vendi i ngjarjes duke hedhur armën e zjarrit në tokë.
Në Sallën Operative të Komisariatit të Policisë Elbasan , ka ardhur një telefonatë se në lagjen “Viserian Xhuvani”, Elbasan, po ndodh një konflikt në një lokal ku janë dëgjuar dhe të shtëna me armë.
Menjëherë në drejtim të vendngjarjes kanë shkuar shërbimet e policisë, ku falë reagimit të shpejtë të mirëorganizuar, kanë bërë të mundur arrestimin në flagrancë të shtetasit: B.S., 41 vjeç, banues në Elbasan.
Në cilësinë e provës materiale u sekuestruan një armë e zjarri pistolet, si dhe një gëzhojë.
Materialet i kaluan Prokurorisë pranë Gjykatës së Shkallës Parë Elbasan, për veprat penale. “Mbajtja pa leje dhe prodhimi i armëve, armëve shpërthyese dhe i municionit” dhe “Prishja e qetësisë publike”
