Falë bashkëpunimit mes FAST Albania dhe FAST Italia, është finalizuar me sukses një tjetër operacion për kapjen e personave të shpallur në kërkim ndërkombëtar. Ky operacion policor ndërkombëtar ishte koduar “BERGAMO”.
Në kuadër të tij, është bërë i mundur arrestimi i një 1 shtetasi shqiptar në Bergamo të Italisë, i cili rezulton i dënuar me 7 vjet burgim për veprën penale “Mashtrimi”. Ai identifikohet si Renato Numani, 54 vjeç, nga qyteti i Fierit.
Njoftimi i plotë i policisë:
Në kuadër të bashkëpunimit që FAST Albania ka me kolegët e rrjetit ENFAST, është organizuar dhe finalizuar një tjetër operacion për kapjen e personave të shpallur në kërkim ndërkombëtar.
Pas informacioneve të grumbulluara nga FAST Albania, për vendndodhjen e 1 shtetasi në kërkim, i cili jetonte në Itali, dhe pas përcjelljes së këtyre informacioneve homologëve të FAST Italia, në kuadër të operacionit policor të koduar “Bergamo”, është bërë e mundur që në qytetin Bergamo të Italisë, të kapet nga FAST Italia, shtetasi shqiptar i shpallur në kërkim ndërkombëtar Renato Numani, 54 vjeç, nga Fieri.
Ky shtetas është i dënuar me 7 vjet burgim për veprën penale “Mashtrimi”, pasi në vitin 2015 i ka marrë një shtetasi, nëpërmjet mashtrimit, 10 milionë lekë të reja.
Shtetasi Renato Numani fshihej prej disa vitesh në Bergamo të Italisë, ku jetonte me familjen e tij.
Interpol Tirana, në bashkëpunim me Interpol Roma, po vijon punën për plotësimin e dokumentacionit të nevojshëm, me qëllim ekstradimin e këtij shtetasi drejt Shqipërisë.