Shtetasi 38-vjeçar i cili u gjet i vdekur në aksin rrugor Lushnjë-Fier është identifikuar si Betim Kastrati. Policia bën me dije se ai ka qëlluar veten me armë zjarri duke gjetur vdekjen e menjëhershme pasi kishte parkuar mjetin e tij në vendin e quajtur Kolonjë.
Ndërkohë, kanë dalë në dritë të tjera detaje për viktimën, ku raportohet se ai ishte banues në qytetin e Durrësit dhe punonte në port. Mësohet se 38-vjeçari kishte shfaqur shenja të depresionit.
Viktima ishte i martuar dhe kishte 2 fëmijë të mitur, ndërkohë që u gjet i pajetë në mjetin e tij tip Volvo, i cili ishte parkuar në mënyrë të rregullt anës rrugës.
Paraprakisht pati dyshime për ndonjë vrasje dhe policia e hetoi ngjarjen fillimisht në këtë pistë, por më pas, policia konfirmoi se Kastrati kishte vrarë veten, në kushtet e depresionit.
Njoftimi i plotë i policisë:
Në aksin rrugor Fier-Lushnjë, në afërsi të rrethrrotullimit të Kolonjës, në një xhep rruge, brenda në automjetin tip “Volvo”, i parkuar në mënyrë të rregullt, është gjetur i pajetë shtetasi B.K, 38 vjeç, banues në Durrës.
Nga tërësia e veprimeve paraprake të kryera dhe provat e gjetura në vendngjarje dyshohet se shtetasi B. K., si pasojë e depresionit është vetëvrarë me armë zjarri pistoletë e cila u sekuestrua në cilësinë e provës materiale.
Grupi hetimor nën drejtimin e Prokurorisë vijon punën për zbardhjen dhe sqarimin e plotë të rrethanave të ngjarjes.