SHBA nuk po dërgon vetëm drone luftarake të tipit Switchblade, të ashtuquajturat drone kamikaze, në Ukrainë. Ata gjithashtu kanë trajnuar disa ushtarë për të luftuar në mënyrë specifike kundër trupave të Putinit. Ushtria amerikane po trajnon një numër të vogël ushtarësh ukrainas në SHBA për të përdorur dronët luftarakë të tipit switch, të njohur si dronë kamikaze.
Një përfaqësues i Departamentit të Mbrojtjes së SHBA-së tha se një numër ushtarësh ndodhen në Shtetet e Bashkuara për trajnim që para se të fillonte lufta e agresorit rus kundër Ukrainës.
“Ne shfrytëzuam rastin për t’i marrë ata mënjanë për disa ditë dhe për ti stërvitur, veçanërisht në përdorimin e Switchblade,” tha zyrtari i Pentagonit.
Ushtarët do të kthehen në Ukrainë së shpejti. Dronët e vegjël, të lëvizshëm dhe të pajisur me një kokë lufte Switchblade drejtohen në objektivin e tyre dhe shpërthejnë atje. Prandaj, në gjuhën e folur quhen drone kamikaze.
SHBA-ja furnizon me dronë forcat e armatosura ukrainase për t’i mbështetur ato në luftën kundër Rusisë. Ukrainasit përdorin dronë të ndryshëm në luftë, një mjet i rëndësishëm në luftën kundër ushtrisë ruse. Ekziston edhe një njësi elitare e dronëve ukrainase e quajtur Aerorozvidka. Grupi u themelua në vitin 2014 nga disa të apasionuar pas dronëve.
Kur Rusia sulmoi Krimenë, ata u integruan shpejt në ushtri pasi kishin përvojë me dronët dhe ishin gjithashtu të aftë në riparimin dhe modifikimin e pajisjeve të prishura. Dhe tani ata po përdoren me sukses në luftën kundër Putinit.
Aerorozvidka synon tanke, automjete komanduese dhe armë ruse. Proçedura është e thjeshtë. Ndërsa bie muzgu, rusët parkojnë tanket dhe automjetet e tyre midis shtëpive për t’i mbrojtur ata nga artileria e zakonshme ukrainase. Gjatë kësaj kohe Aerorozvidka vë në shënjestër autokolonën e Putinit.
Njësia speciale nuk përdor vetëm një lloj droni. Në përdorim janë edhe dronët Bayraktar TB2. Dronët janë relativisht të lirë – dhe ende vdekjeprurës. Bayraktar TB2 është i vogël dhe i lehtë me një hapje krahësh prej 12 metrash. Ai kontrollohet me radio dhe mund të qëndrojë në ajër deri në 30 orë në të njëjtën kohë. Sipas prodhuesit Baykar Technologies, droni mund të mbajë deri në 4 raketa të drejtuara me lazer.
Në përdorim është edhe droni R18, i cili ka një rreze veprimi prej katër kilometrash dhe mund të transportojë disa bomba. Përveç kësaj, njësia speciale përdor edhe PD-1, i njohur gjithashtu si droni Punisher, i cili u zhvillua nga vetë Ukraina. Ai mund të transportojë disa kilogramë eksploziv për gati 50 kilometra.