Policia e Tiranës ka vënë në pranga një 31-vjeçar të akuzuar për vrasjen e mbetur në tentativë të biznesmenit Lulzim Masha.
Në 18 janar të këtij viti, 31-vjeçari Skerdi Tasi qëlloi me armë zjarri dy herë në drejtim të administratorit të një shkolle private në Tiranë, Lulzim Masha, teksa po kalonte me makinë pranë Liqenit të Thatë.
Ky i fundit, i cili është administrator i shkollës private “Willson”, tha në atë kohë në polici se nuk kishte patur konflikte me asnjë person dhe se plumbat ishin qëlluar pas një sherri mes disa të rinjve.
Njoftimi i Policisë Tiranë:
Specialistët për Hetimin e Krimeve në Komisariatin e Policisë Nr. 1 bënë ndalimin e shtetasit:
– S. T., 31 vjeç, për veprat penale “Vrasja me paramendim” e mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”. Ky shtetas me datë 18.01.2022, te nënkalimi te Liqeni i Thatë, ka qëlluar me armë zjarri në drejtim të mjetit me drejtues shtetasin L. M., 63 vjeç.