Këtë të premte, krerët e grupeve parlamentare do të takohen për të vijuar me negociatat për zgjedhjen e Presidentit të ri të Republikës, ndërsa jemi vetëm tre ditë larg raundit të parë të caktuar më 16 maj.
Mësohet se takimet do të zhvillohen të ndara, ku fillimisht pritet të diskutohet mes kreut të Grupit Parlamentar socialist Taulant Balla dhe Mesila Dodës, rreth orës 10:00. Më pas, takimi i radhës i Ballës do të jetë me Fatmir Mediun.
Ndërkohë, ende nuk është njoftuar një konfirmim zyrtar nga ana e Enkelejd Alibeajt për të zhvilluar negociata me Ballën.
Enkelejd Alibeaj ka prezantuar një platofrmë, me anë të së cilës kërkon që kandidati për President duhet të jetë së pari antikomunist. Por Partia Socialiste e ka refuzuar këtë platformë të tij.
Nga ana tjetër, Mediu ka dhënë propozimin se do të ishte mirë që opozita të dilte me një kandidat të përbashkët dhe të merrte pjesë në proces. Në të kundërt, Mediut thotë se nëse nuk dilet me një kandidaturë konsensuale, atëherë opozita duhet të mbajë një qëndrim.
Nga sa është deklaruar, socialistët nuk do të kenë një emër në raundin e parë, duke i lënë rrugë të hapur negociatave.