Ministrja e Bujqësisë, Frida Krifca ishte sot në Belsh ku ka inspektuar nga afër pikën e grumbullimit të ndërtuar me fonde publike për të zgjeruar tregun për fermerët e kësaj zone, ku bujqësia përbën 70% të ekonomisë në vend.
Në një takim me fermerët e Belshit në hapësirën e dedikuar për produktet bujqësore, ministrja u shpreh se ky investim tregon një standart dhe një realitet të ri bujqësor në vend, i cili zhvillohet gjithmonë e më shumë.
Kjo pikë grumbullimi është e para që hapet në këtë zonë dhe do të shërbejë si një treg i hapur për fermerët, duke iu dhënë atyre mundësinë që të të shesin produktin në kushte më të mira. Ministrja Krifca tha se falë këtyre investimeve, i jepet edhe më shumë vlerë markës shqiptare, duke bërë që vendi ynë të njihet edhe për produktet e përpunuara.
Që prej 2017 janë ndërtuar 240 pika grumbullimi me standarte ndërkombëtare, me kapacitete ruajtëse e frigoriferike, duke ruajtur produktin bujqësor për ta tregtuar me çmim më të mirë.
Qendra e grumbullimit e ngritur në Belsh do të mbështesë kryesisht produktet e serave, vreshtarisë, ullishteve dhe bimët medicinale të cilat janë dhe prodhimet kryesore të zonës. Falë ngritjes së qëndrës së grumbullimit tregu do të jetë më i aksesushëm për tregtarët dhe fermerët e bashkisë së Belshit dhe fshatrave përreth.
Tashmë tregtarët dhe fermerët do të kenë një treg të sigurtë për produktet e tyre bujqësore.