Ditën e djeshme, Kuvendi i Shqipërisë dështoi për të zgjedhur në raundin e parë presidentin e ri të Republikës. Seanca plenare e mbajtur dje në orën 17:00 zgjati vetëm 3 minuta, pasi u konfirmua se nuk është regjistruar asnjë kandidaturë nga palët politike.
Bazuar në Kushtetutën e vendit, ky quhet si një raund votimi i ezauruar pavarësisht se s’pati asnjë kandidat për t’u votuar. Në këtë situatë, tashmë pritet të vijohet me raundet e tjera.
Paraprakisht duhet përcaktuar një datë të re për raundin e radhës dhe për këtë do të ketë sot një mbledhje të Konferencës së Kryetarëve, e cila do të nisë në orën 10:00. Raundi i dytë, duhet të jetë brenda 7 ditësh, pra deri më 24 maj.
Kujtojmë se Kushtetuta parashikon 5 raunde votimi për zgjedhjen e Presidentit të Republikës së Shqipërisë. Në tre raundet e para, Presidenti duhet të zgjidhet me 3/5 e votave, pra 84 vota. Sipas ndryshimeve të bëra në Kushtetutë, në rast se në fund të tre raundeve nuk është zgjedhur ende një person, atëherë kalohet në raundin e katërt, ku Presidenti duhet të zgjidhet me 71 vota.
Nëse në raundin e katërt njëri prej kandidatëve të mbetur në garë nuk siguron 71 vota, kalohet për votim në raundin e pestë, ku sërish duhen 71 vota. Nëse dështohet edhe në raundin e pestë, atëherë shpërndahet Parlamenti dhe shkohet në zgjedhje të parakohshme dhe do të jetë maxhoranca e re që do të zgjedhë Presidentin.