Kanë dalë në dritë disa nga emrat që mund të propozohen nga kreu i Grupit Parlamentar të PD-së, Enkelejd Alibeaj si kandidatë potencialë për kreun e ri të shtetit. Mes emrave që qarkullojnë brenda demokratëve janë Ina Rama, Visar Zhiti, Dritan Demiraj, Dashamir Shehi, Neritan Ceka apo Arben Cejku. Ndërkohë Majlinda Bregu dhe Dashamir Shehi pritet të jenë propozime të aleatëve të PD-së.
Vlen të theksohet se një nga emrat më të rëndësishëm është ish-kryeprokurorja e Përgjithshme Ina Rama, e cila spikat për përplasjet e ashpra me Sali Berishën disa vjet më parë.
Siç duket, këto emra vijnë si një përpjekje nga Enkelejd Alibeaj për të propozuar atë që ai ka theksuar në mbledhjet e mëparshme, një President të shqiptarëve dhe jo të partisë.
Këtë të enjte është programuar edhe një mbledhje e Grupit Parlamentar në selinë e Partisë Demokratike, ku pritet që Alibeaj bashkë me mbështetësit e tij do të diskutojnë mbi emrat që do propozojnë për President.
Kujtojmë se mes mazhoracnës dhe opozitës dje u arrit dakordësia e parë që në dy raundet e ardhshme, të dytin dhe të tretin do të jetë opozita ajo që propozon kandidatët dhe më pas socialistët.