Ditën e sotme u arrestua supertifozi i Kombëtares shqiptare Ballist Morina. Sipas informacioneve, Morina u vu në pranga nga policia e Kukësit paraditen e sotme në qytetin e Kukësit.
Burimet bëjnë me dije se për Ismail Morinën ekzistonte një urdhër arresti, pasi kishte edhe 5 muaj burg pa shlyer për armëmbajtje pa leje.
Njoftimi nga Policia Kukës:
Efektivët e Komisariatit të Policisë Kukës ndaluan shtetasin Ismail Morinaj, 40 vjeç, banues në fshatin Shikaj, Kukës, i shpallur në kërkim për llogari të DVP Durrës. Ky shtetas u ndalua pasi gjatë verifikimeve ka rezultuar person në kërkim nga Drejtoria Vendore e Policisë Durrës.
Për këtë shtetas, Gjykata e Rrethit Gjyqësor Durrës ka vendosur revokimin e vendimit penal të Gjykatës së Rrethit Gjyqësor Tiranë, për lirimin e tij me kusht dhe ka caktuar vuajtjen e pjesës së mbetur të dënimit, 5 muaj e 12 ditë burgim, për veprën penale “Prodhimi dhe mbajtja pa leje e armëve luftarake dhe municioneve”.
Procedurat e mëtejshme për këtë shtetas do të kryhen nga DVP Durrës.