Ilir Meta iu është përgjigjur këtë të hënë deklaratave të ministrit të Jashtëm të Greqisë, Nikos Dendias, i cili deklaroi se Presidenti nuk jep autorizim për dërgimin e çështjes së detit në Gjykatën e Hagës.
Në një konferencë për shtyp, kreu i shtetit theksoi se ai ka dhënë autorizim për çdo kërkesë që i është bërë.
“Në datë 23 maj, javën e kaluar, ministri grek ka vizituar Shqipërinë, duke u takuar me ministren e jashtme dhe kryeministrin. Nga pala greke nuk është kërkuar asnjë takim i ministrit Dendias me Presidentin. Ministri Dendias ndër të tjera është shprehur se u ra dakord që t’ia referojmë çështjen tonë gjykatës në Hagë. Kjo nuk ka ndodhur, tha Ministri Dendias, pasi Presidenti nuk i ka dhënë autorizimin përkatës. Kjo do ndodhë pas 2-3 muajsh kur të zgjidhet Presidenti i ri. Dua të sqaroj se Ministri i Jashtëm, zoti Bushati, përmes kërkesës, 13 shkurt 2018, paraqiti kërkesën për krijimin e grupit negociator. Pas paraqitjes së informacionit shtesë nga ministri i jashtëm, Presidenti përmes aktit, autorizoi ministrin e Jashtëm që sipas kritereve, të lëshojë plotfuqinë për projektmarrëveshjen. Saktësimin e vijës delimituese. Delimitimin e shefit kontinental. Grupi negociator i Shqipërisë, është pajisur me autorizim, për të arritur një marrëveshje për përkufizimin e zonave detare. Përpos detyrave të tjera, vetëm grupi negociator është autoriteti i vetëm.”
Kreu i shtetit sqaroi se në qershor të vitit 2018, ai ra dakord me kryeministrin Edi Rama që ky i fundit të ishte kryenegociator me Greqinë për çështjen e detit, por, sipas tij, edhe pse e ka autorizuar kryeministrin që të udhëheqë negociatat, nuk ka pasur asnjë reagim nga shefi i qeverisë.