Ukraina e konsideron një masë jo të mjaftueshme sanksionet e vendosura kundër Rusisë nga Bashkimi Evropian.
Ihor Zhovkva, Nënkryetari i zyrës së Presidentit ukrainas, u shpreh se ritmi i sanksioneve ndaj Rusisë deri më tani ka qenë shumë i ngadaltë dhe se Ukraina “nuk është e kënaqur”.
“Nëse më pyesni mua, unë do të thosha shumë ngadalë, shumë vonë dhe definitivisht jo mjaftueshëm. Ukraina nuk është gjithashtu e kënaqur me ritmin e dërgesave të armëve nga Perëndimi. Ne besojmë në premtime”, deklaroi Zhovkva.
Një ditë më parë, presidenti amerikan, Joe Biden deklaroi se SHBA nuk do ta furnizojnë Ukrainën me sisteme të raketave me rreze të gjatë veprimi, të cilat do të mund të arrinin në territorin e Rusisë.
Ishte pikërisht presidenti ukrainas Volodymyr Zelensky që i kërkoi SHBA-së një sistem të tillë raketor, që sipas tij do ta ndryshonte “rrjedhën” e luftës në Ukrainë.
Por, presidenti Biden hodhi poshtë zërat se SHBA do t’i dërgojë Ukrainës një sistem të tillë raketor.