Ky është padyshim një nga rreth-rrotullimet më të çuditshme në botë Rreth rrotullimi i Shënavlashit në Durrës është konceptuar gabim, pasi nuk i lidh rrugët e këtij kryqëzimi. Duke qenë se nuk vendoset në qendër, në njërin sens automjetet ecin drejt, duke e shmangur plotësisht rrethrrotullimin nga krahu i djathtë.
Ekspertët e sigurisë rrugore shprehen se dhe pse i konceptuar në këtë formë, rrethrrotullimi është i paplotë dhe me probleme.
Fatmir Hasho, ekspert i sigurisë rrugore tha për Tv Klan se “ këtu ka ishull trafiku, ndërsa nga ana tjetër mungon. Është detyrim i Entit të ndërtojë një ishull trafiku në krahun tjetër të rrethrrotullimit. Për mua është i ndërtuar keq sepse ka lejuar një korsi të plotë dhe kjo lejon makinat të kalojnë drejt.”
Drejtuesit e automjeteve mbeten të pa orientuar edhe nga mungesa e tabelave. Tabelat e rrethrrotullimit mungojnë në dy drejtime.
“Shikojmë këtë automjetin e rëndë që absolutisht nuk duhet të kalojë aty, por meqenëse nuk ka tabelë, ai ka të drejtën të kalojë dhe asnjë lloj organi nuk mund ta penalizojë pse bëri atë gabim.”
Disa tabela janë të vendosura gabim.
“Kjo tabele STOP për mua është e vendosur shumë gabim. Atje duhej vendosur një tabelë rrethrrotullimi dhe me një paralajmërim që po hyjmë në një nyje kryesore.”
Pikërisht këto mangësi për pak sa nuk shkaktuan aksidentin e radhës në këtë rreth rrotullim.
Kryqëzimi i Shënavlashit në Durrës konsiderohet nga ekspertet e sigurisë rrugore si një pikë e zezë për nga rreziku që paraqet për aksidente. Fakt ky që pohohet nga drejtuesit e automjeteve dhe banorët e zonës. Shofer prej afro 50 vitesh, Gani Hyseni, banor i Shënavlashit, thotë se në këtë kryqëzim aksidentet kanë qenë të shumta. / Rashela Shehu
“Ja këtu ku jemi ka ndodhur një aksident. Unë kam lëvizur në shumë akse të vendit, por kjo këtu është shumë e rrezikshme”.
Veç rrezikut të aksidenteve, drejtuesit e automjeteve penalizohen me gjobat për kalim të parregullt ndërkohë që sinjalistika mungon.
Për këtë shqetësim të tyre eksperti Hasho ndan dy qëndrime.
“Ku nuk ka tabele, skanë përse të gjobiten. Aty ku kemi tabelën e vendosur dhe nuk e zbatojmë, gjoba është 100% e drejtë”.
Në këtë rrethrrotullim kanë humbur jetën disa qytetarë. Po edhe pse një nga rrugët problematike, investimet në këtë kryqëzim mungojnë prej vitesh.
