Ministri i Brendshëm, Bledi Çuçi ka reaguar pas operacionit në Shkodër, ku blutë e qytetit kanë arritur të finalizojnë operacionin për kapjen e personave që morën pjesë në grabitjen e bankës në Koplik.
Çuçi shprehet se zbardhja e kësaj ngjarjeje, si dhe zbulimi i “shtëpisë së barit” po në këtë zonë, është dëshmi e punës profesionale hetimore dhe operacionale të Policisë së Shtetit.
“Operacioni në Shkodër për zbardhjen e grabitjes së filialit të një banke dhe zbulimi ambientit të kultivimit të kanabisit me anë të llambave, që çoi në pranga 9 persona, është dëshmia e radhës e punës profesionale hetimore dhe operacionale të Policisë së Shtetit, për të cilën meriton përgëzim dhe respekt. Pa asnjë hezitim dhe pa asnjë kompromis përballë krimit, me bindjen e plotë se vetëm në këtë mënyrë kontribuojmë për një shoqëri më të sigurt e ku e ardhmja jonë e nuk vihet në rrezik”, shkruan Çuçi.