Microsoft zvogëlon më tej ndjeshëm operacionet e tij në Rusi, pas më shumë se tre muaj nga pushtimi i Ukrainës.
Bloomberg raporton, se gjiganti i Redmond, pasi bllokoi shitjen e produkteve dhe shërbimeve në vend në fillim të muajit mars, ka vendosur të mbyllë plotësisht zyrat dhe bizneset e tij, një vendim që prek 400 punonjës.
“Si rezultat i ndryshimeve në perspektivën ekonomike dhe ndikimit në biznesin tonë në Rusi, ne kemi marrë vendimin për të reduktuar ndjeshëm operacionet tona – tha një zëdhënës i Microsoft për Bloomberg News. Ne do të vazhdojmë të përmbushim detyrimet tona kontraktuale ekzistuese me klientët, rusë”.
CFO e Microsoft, Amy Hood zbuloi në fillim të këtij viti se Rusia përbën më pak se 1% të të ardhurave globale të kompanisë.
Gjiganti amerikan nuk është i pari që pezullon apo mbyll aktivitetet e tij në Rusi. Shumë kompani ndërkombëtare, duke përfshirë Dell, Apple, Nike dhe Adidas, prej kohësh kanë ndërprerë lidhjet me Moskën, duke mbyllur dyqanet ose duke ndaluar shitjet. Është e paqartë nëse punonjësit e prekur nga vendimi do të zhvendosen në zona të tjera të Microsoft, me mundësinë e punës nga distanca.