Këngëtari 28-vjeçar ndau për herë të parë në rrjetet sociale të premten lajmin se vuante nga sindroma Ramsay Hunt, një ndërlikim i rrallë i virusit të herpesit.
Në një video të shkurtër të shpërndarë në Instagram, ai shihet dukshëm i paaftë për t’i mbyllur sytë teksa ndan përvojën e tij me fansat dhe tregon se pse i është dashur të anulojë paraqitjet e tij të shumëpritura.
“Hej të gjithëve, doja t’ju informoja për atë që po ndodh siç mund ta shihni me fytyrën time. Unë kam këtë sindromë të quajtur sindroma Ramsay Hunt dhe është nga ky virus që sulmon nervat e veshit tim dhe nervat e fytyrës sime dhe ka bërë që fytyra ime të ketë paralizë”- shpjegoi ai.
Kjo bëri që një ekspert neurologjik të sugjeronte se gjendja e tij ishte në skajin më të rëndë të spektrit dhe madje mund ta lërë këngëtarin me paralizë afatgjatë.
Profesor Derick Wade, një ekspert në rehabilitimin neurologjik në “Universitetin e Oxford Brookes” thotë se këngëtari mund të ketë efekte “afatgjata” si rezultat i gjendjes së rrallë.
Megjithëse shumica e njerëzve shërohen plotësisht, Justin duket se ka një “rast serioz të virusit”, tha profesori.
“Vura re se nuk kishte asnjë lëvizje, kështu që është humbje mjaft e rëndë”, tha ai për “Sky News”.
Duke marrë parasysh që Justin ka akses në shërbimet më të mira mjekësore, mundësia është e lartë që ai të kalojë pa pasoja serioze.