Jo shumë larg brigjeve shqiptare, Rusia ka dislokuar në Mesdhe luftanijen “Varyag”, e njohur edhe si binjakja e “Moskva”-s, kryqëzori rus me raketa me vetëdrejtim që u fundos në Detin e Zi disa javë më parë nga ukrainasit.
Luftanija ruse Varyag është ndërtuar për marinën sovjetike dhe sot i shërben marinës ruse. Puna për ndërtimin e saj nisi në vitin 1979 në fabrikën e ndërtimit të anijeve në Nikolayev dhe përfundoi në korrik të vitit 1983. Ajo u vu në punë më 16 tetor 1989.
Luftanija iu bashkua flotës së Paqësorit në vitin 1990. Në vitin 2009, Varyag drejtoi një flotë luftanijesh të huaja që morën pjesë në një paradë për të shënuar 60-vjetorin e Marinës së Kinës.
Në qershor 2010 Varyag, nën komandën e kapitenit Eduard Moskalenko dhe me komandantin e Forcave të Flotës Veriore Vladimir L. Kasatonov u vendos në San Francisko.
Kjo vizitë përkoi gjithashtu me vizitën e presidentit Medvedev në Silicon Valley ku ai vizitoi edhe një herë Varyag-in, pas vizitës së parë në Singapor në vitin 2009.
Nga 8 deri më 11 nëntor 2011, Varyag, bëri një vizitë portuale në Vancouver, gjatë përkujtimit të ushtarakëve të vrarë në konflikte të armatosura.
Në nëntor 2014, Varyag udhëhoqi një dislokim të katër anijeve detare ruse në ujërat ndërkombëtare jashtë Australisë. Dislokimi besohej të ishte i lidhur me samitin e G-20 në Brisbane të vitit 2014 dhe tensionet në rritje midis dy vendeve.
Në fillim të janarit 2016, Varyag u raportua se kishte hyrë në Detin Mesdhe përmes Kanalit të Suezit për t’u vendosur jashtë bregut të Sirisë duke zëvendësuar anijen Moskva, në mbështetje të operacionit ajror të Rusisë në Siri që kishte filluar në vjeshtën e vitit 2015.
Më 20 Prill të vitit 2017, Varyag u vendos në Manila ku qëndroi për të paktën katër ditë bashkë me Pechengan, gjithashtu pjesë e Flotës së Paqësorit të Rusisë.
Gjatë ekspeditës, e cila filloi më 1 prill, të dy anijet vizituan Busan në Korenë e Jugut, Manilan në Filipine, Cam Ranh Bay në Vietnam, Sattahip në Tajlandë, Changi në Singapor dhe Tanjung Priok në Indonezi. Objektivi kryesor i misionit ishte nënvizimi i pranisë së Rusisë dhe forcimi i lidhjeve me vendet e rajonit Azi-Paqësor.