Një tjetër gazetar është qëlluar për vdekje në Meksikë, vend i cili është kthyer ndër më të rrezikshmit në botë për punonjësit e medias.
Antonio de la Cruz, 47 vjeç, u qëllua për vdekje teksa dilte nga shtëpia me të bijën e tij 23-vjeçe, e cila mbeti e plagosur.
De la Cruz, punonte si gazetar në të përditshmen Expreso prej tre dekadash. Ai u vra pranë hyrjes së shtëpisë në qytetin Ciudad Victoria.
De la Cruz raportonte për çështjet sociale, si dhe për partinë politike Movimiento Ciudadano dhe deputetin e saj të zonës, Gustavo Cárdenas Gutiérrez.
Expreso ka qenë dhe më parë objekt sulmesh. Në vitin 2012 para ndërtesës së gazetës, shpërtheu një makinë bombë, ndërsa në 2018, një enë frigoriferike me një kokë njeriu brenda u la në ambientet e saj.
Që prej fillimit të këtij viti, në Meksikë janë vrarë 12 punonjës mediash.