Për gati pesë muaj tashmë, Ukraina po lufton kundër trupave rus.
Kjo gjendje e vështirë e vendit ka ndikuar edhe në marrëdhënien e presidentit Volodymyr Zelensky dhe zonjës së parë të Ukrainë, Olena Zelenska. Kjo e fundit, ka realizuar një intervistë për CNN, ku është shprehur se për shkak të gjendjes ku ndodhet vendi i tyre, ajo nuk mundet ta takojë shpesh bashkëshortin e saj. Madje zonja e parë e Ukrainës deklaroi se marrëdhënia e saj me Zelenskyn është “në pauzë”.
“Nuk është një marrëdhënie normale kur fëmijët nuk mund ta shohin babanë e tyre dhe duhet të flasin me të në telefon. Kështu që marrëdhënia jonë është në pauzë ashtu siç është për të gjithë ukrainasit”, -u shpreh Olena Zelenska.
“Ne presim të bashkohemi, të jemi sërish bashkë, të kalojmë mbrëmjet së bashku, të flasim me fëmijët për gjërat e tyre-,”shtoi zonja e parë e Ukrainës.
Ju kujtojmë që presidenti dhe bashkëshortja e tij, refuzuan që më 24 shkurt, kur nisi lufta në Ukrainë të largohen nga vendi i tyre. Në dy muajt e parë të luftës ata nuk janë takuar fare me njëri-tjetrin. Zelensky në atë kohë jetonte në zyrën e tij së bashku me stafin, ndërsa Olena dhe dy fëmijët mbaheshin në një vend sekret.