Ervin Salianji ka dhënë një deklaratë për mediat pasi Gjykata e Apelit shtyu seancën gjyqësore për rastin “Babale”. I pyetur nga gazetarët se çfarë do të bëje nëse do të lihet në fuqi vendimi i Shkallës së parë, deputeti demokrat tha se çdo lloj vendimi do të respektohet, por shtoi se me të gjitha provat në dispozicion, nuk ka gjykatë që të marrë vendim në dëm të tij.
“Çfarë do bëj? Do të hidhem përpjetë? Çdo vendim do të respektohem. po them me fakte e me prova që s’ka gjykatë që s’e merr parasysh. Sot ata nuk janë në sistemin gjyqësor që i bën të paragjykuar në vendimmarrje. Çështja do të shkojë në të gjitha instancat ligjore. Nuk mund të ketë dënim për denoncim publik. Kam bërë detyrën time si politikan…”
Kurse, i pyetur nëse mendon se është përdorur nga Fredi Alizoti, Salianji tha se nuk ka pasur asnjë lloj komunikimi me të ndërsa shtoi se edhe sikur një milionë herë t’i vinte rasti, do ta denonconte.
“Nuk kam komunikuar më parë, nuk i njoh. Nuk ka si të behet kallëzim i rremë me persona që s’i njeh. S’kam pasur kontakt me të. Nga ana tjetër janë dy elementë që nuk mund të shmangen dot, komunikimet e shpeshta mes Babales dhe Veliut.”
Deputeti demokrat u shpreh i sigurt se ka 1100% shanse të dalë i pafajshëm pasi nuk ka kryer asnjë vepër penale.
Gjykata e Apelit shtyu sot seancën gjyqësore për dosjen “Babale” për më 18 korrik, ora 14.00. Të pranishëm në seancë, në mbështetje të Salianjit ishin deputetet Luan Baçi, Saimir Korreshi, Elda Hoti, Flamur Noka, Luçiano Boçi, Belind Këlliçi, Selaudin Jakupllari, Kasem Mahmutaj, Bledion Nallbati.