Ministrja e Shtetit për Marrëdhëniet me Parlamentin, Elisa Spiropali ka komentuar mbrëmjen e sotme në një emision televiziv në lidhje me protestën e PD më 7 korrik, ku thotë se nuk është kundër qeverisë, por përdoret nga kryedemokrati, Sali Berisha.
Gjatë një interviste televizive, Spiropali thotë se me protestën e 7 korrikut, Berisha do që të realizojë atë që nuk arriti ta realizonte me dhunë më 8 janar, marrjen e PD.
“Protesta e Sali Berishës nën muret e Kryeministrisë për të realizuar atë që nuk realizoi dot me dhunë në muret e PD në 8 janar. Kjo nuk është protestë kundër qeverisjes, por për të marrë përfundimisht PD. Ky është leximi i një mendje të ftohtë që ka ndjekur zhvillimet politike. Gjysma e deputetëve të PD nuk e ndjekin Sali Berishën. Ai kërkon të vendosë diktatin në grupin parlamentar dhe këtë e tregoi dhe me ndarjen e punëve për deputetët”, – tha Spiropali.