Sekretari i Përgjithshëm i PD-së, Flamur Noka ka bërë një paralajmërim për ata që do të tentojnë të bllokojnë qytetarët që do t’i bashkohen nesër protestës së thirrur nga Sali Berisha.
I ftuar në emisionin “Pikat mbi i”, ai iu bëri thirrje drejtuesve të Policisë dhe ministrit të Brendshëm, që të mos pengojnë qytetarët që do të marrin pjesë në protestë, pasi, në të kundërt do të mbajnë përgjegjësi.
“Ka informacione se po bllokohen qytetarët për të ardhur në Tiranë. I bëj thirrje drejtorit të policisë dhe ministrit që në mënyrë absolute të lejojnë qytetarët të vijnë, të bëjnë detyrën përballë ligjit dhe jo përballë regjimit. Ne monitorojmë, ne do të ndjekim nga afër çdo gjë. Çdokush që do të bëjë qoftë edhe përpjekjen më të vogël për të provokuar, do të mbajë përgjegjësi. Që do të thotë, çdokush që do të përpiqet të pengojë, të frenojë e shantazhojë protestuesit, do të ketë përgjigjen e PD dhe të Fondit për Shpëtimin e Shqipërisë”, u shpreh Flamur Noka.