Me temperatura që tejkalojnë 40 gradë, Gadishulli Iberik po testohet sërish, ku merkuri pritet të rritet më tej në ditët në vijim, më pak se një muaj pas valës së mëparshme të të nxehtit.
Valët e përsëritura të të nxehtit janë pasojë e drejtpërdrejtë e ndryshimeve klimatike, sipas shkencëtarëve, pasi emetimet e gazeve serrë rritin njëkohësisht intensitetin, kohëzgjatjen dhe shpeshtësinë e këtyre fenomeneve.
Sipas shërbimit meteorologjik spanjoll AEMET sot termometri pritet të tregojë deri në 42 gradë në Extremadura dhe 41 në Andalusia. Në veriperëndim, ku zakonisht nuk është aq nxehtë, temperatura maksimale mund të kalojë 35 gradë.
Vala e të nxehtit që filloi të dielën pritet të zgjasë 9-10 ditë, duke e bërë atë “një nga tre valët më të mëdha të të nxehtit që ka përjetuar Spanja që nga viti 1975”, tha Ruben del Campo, një zëdhënës i AEMET. Ai kujtoi gjithashtu se valët e të nxehtit janë dyfishuar në 12 vitet e fundit.
Temperaturat më ekstreme sipas AEMET priten nga nesër deri të enjten. Agjencia nuk ishte në gjendje të dinte deri tani nëse do të thyejë rekordin absolut të vendosur gushtin e kaluar në Montoro prej 47.4 gradë Celsius.
Në Portugalinë fqinje, merkuri arriti deri në 44 gradë të dielën në disa zona, duke e bërë të vështirë shuarjen e zjarreve, më i madhi prej të cilëve, në komunitetin Ourem, u vu nën kontroll sot.
Një valë e re e të nxehtit po godet aktualisht Francën jugperëndimore nga dita e sotme. Sinoptikanët presin që temperaturat të lëvizin ndërmjet 36-38 gradë në luginën e Rhone të martën dhe më pas nxehtësia do të përhapet në qendër, lindje dhe veri.
Ka mundësi që nga e diela e tutje të kalojë në valë të të nxehtit (temperatura e lartë ditë e natë). Sipas Sébastien Leas, nga Météo-France, fenomeni do të zgjasë 8-10 ditë dhe kulmi i tij pritet “mes së shtunës dhe të martës”, 19 korrik.
Një paralajmërim për “nxehtësi ekstreme” nga e diela e ardhshme është lëshuar edhe sot nga Shërbimi Meteorologjik Kombëtar i Britanisë. Temperaturat mund të kalojnë 35 gradë Celsius në Angli dhe pjesë të Uellsit.
Temperaturat tashmë në fillim të kësaj jave kanë qenë më të ngrohta se sa pritej për sezonin. Sot dhe nesër merkuri do të arrijë deri në 33 gradë Celsius në jugperëndim të Britanisë.
Temperatura e lartë rekord në Mbretërinë e Bashkuar daton në 25 korrik 2019 dhe ishte 38.7°C e regjistruar në Kopshtin Botanik të Kembrixhit në Anglinë Lindore.
Bazuar në disa modele parashikimi, kufiri i 40 gradëve mund të tejkalohet në disa pjesë të vendit gjatë fundjavës dhe javës së ardhshme.