Kryetari i Partisë Republikane, Fatmir Mediu e cilëson fundin e një fillimi të ri përgjegjësie hapjen e negociatave për anëtarësimin e Shqipërisë në Bashkimin Evropian.
Në reagimin e tij, Mediu thekson se lufta kundër krimit dhe korrupsionit, zhvillimi i qëndrueshëm ekonomik dhe respektimi i të drejtave të qytetarëve, janë detyrime parësore.
“Hapja e negociatave për antarësimin e Shqipërisë me Bashkimin Europian dhe konferenca e parë ndërministrore është sukses i shqiptarëve. Ky është fundi i një fillimi të Ri përgjegjësie dhe pune konkrete të Institucioneve dhe politikës shqiptare. Padyshim krijohet një marrëdhënie e re dhe mundësi ekonomike me BE dhe fondet e saj. Kuvendi ka një rol shumë të rëndësishëm jo vetëm në përafrimin e legjislacionit, por dhe analizën e gjithë kapitujve të marrëveshjes për anëtarësim. Lufta kundër krimit dhe korrupsionit, zhvillimi i qëndrueshëm ekonomik dhe respektimi i të drejtave dhe lirive të qytetarëve tanë jane detyrime parësore. Garantimi i zgjedhjeve të lira dhe të ndershme është një emergjencë dhe domosdoshmëri. Nuk ka nevojë për triumfalizëm, por përgjegjësi dhe bashkëpunim për ta bërë Shqipërinë Europiane.”