Lee Zeldin, kandidati republikan për guvernator të Nju Jorkut , u sulmua nga një burrë që u përpoq ta godiste me thikë në një ngjarje të enjten, por fatmirësisht arriti të shpëtonte i padëmtuar.
Zeldin po mbante një fjalim kur një burrë u ngjit në skenë dhe u duk se filloi të zihej me kongresmenin.
“Dikush u përpoq të më godiste me thikë në skenë gjatë mitingut të kësaj mbrëmjeje, por për fat të mirë, unë munda ta kapja kyçin e dorës dhe ta ndaloja për disa momente derisa të tjerët e sulmuan”, shkroi Zeldin në Twitter.
Kongresmeni amerikan Lee Zeldin, u bë i njohur dhe në vendin tonë pasi u angazhua dhe i dërgoi një letër Sekretarit të Shtetit, Antony Blinken, ku i kërkonte informacione konkrete për shpalljen e ish-kryeministrit të Shqipërisë person “non-grata”, një vit më parë.
Kryetari i GOP të Nju Jorkut, Nick Langworthy, tha për Associated Press se ai nuk kishte asnjë detaj mbi sulmuesin apo armën e tij, por më pas shkëmbeu mesazhe me Zeldin ndërsa kongresmeni po fliste me policinë.
“Ai është mirë. Ai nuk është lënduar rëndë. Është vetëm një skenë kaotike atje,” tha Langworthy.
Një video e ngjarjes në Perinton e postuar në Twitter tregonte njeriun që dukej se kishte kapur për krahu Zeldin dhe të dy ranë në tokë ndërsa persona të tjerë përpiqeshin të ndërhynin.