Loja politike dhe pritja e vjeshtës me protesta ka zgjuar hapjen e dosjeve. Kreu i grupit parlamentar i PS-së, Taulant Balla zhvilloi një takim me Kryetaren e Kuvendit, Lindita Nikolla mëngjesin e kësaj të mërkurë. Ai u njoh me informacionin që ka ardhur në Kuvend nga Autoriteti për Informim mbi Dokumentet e ish-Sigurimit të Shtetit.
Ndërkohë që Nikolla pritet të takojë Enkelejd Alibeajn dhe Fatmir Mediun. Autoriteti i Dosjeve kërkon ndryshimin e ligjit për të verifikuar edhe politikanët e lartë që dolën të pastër nga dy Komisionet në vitet ’90.
Kujtojmë që Autoriteti përmendi një rast të fundit ku një politikan i nivelit të lartë politik me inicialet I.M ka rezultuar bashkëpunëtor i Sigurimit të Shtetit.
Autoriteti i kërkoi Kuvendit që të ndryshojë ligjin mbi dosjet në vend, për shkak se favorizon politikanët e lartë dhe deputetët e Kuvendit të Shqipërisë, të cilët nuk ndëshkohen pavarësisht se në të shkuarën mund të kenë qenë bashkëpunëtorë të Sigurimit të Shtetit.