E hëna në mediat britanike, nis me shqiptarë. “Daily Mail”, shkruan se më shumë se 4,000 shqiptarë kanë arritur në Britani përmes Kanalit që nga muaji janar.
“Përshkallëzimi i paprecedentë i të ardhurve shqiptarë është për shkak të taktikave të reja nga bandat e trafikimit të njerëzve në Ballkan dhe dobësive në ligjet e “skllavërisë moderne” të Britanisë”,-thuhet në shkrim. Sapo mbërrijnë në Britaninë e Madhe, shqiptarët pohojnë se janë trafikuar ose shfrytëzuar, duke e bërë më të vështirë largimin e tyre.
Dje doli se 20,000 migrantë kanë arritur në tokën britanike këtë vit, një moment historik që nuk u arrit vitin e kaluar deri në fillim të nëntorit. Kjo do të thotë se shqiptarët kanë përbërë një në pesë nga ata që kalojnë Kanalin që nga fillimi i janarit.
“Një pjesë e konsiderueshme e të ardhurve shqiptarë përfundojnë duke kryer krime. Një marrëveshje me Shqipërinë, e nënshkruar nga Patel në korrik 2021, ka çuar në një rritje të numrit të kriminelëve të dërguar në shtëpi”,-shkruan më tej media britanike.